Իշխանական շրջանակներում լուրջ կասկածներ են առաջացել, որ վարչապետ Նիկոլ Փաշինյանը մտադիր է ստեղծել կրոնական նոր կազմակերպություն։ Այս տեղեկությունը հրապարակվել է «Հրապարակ» թերթի կողմից՝ վկայակոչելով իր աղբյուրներին։
Համաձայն հրապարակման՝ որոշ շրջանակներ այս հեռանկարը սարսափով են քննարկում՝ համոզված լինելով, որ Վեհափառի դեմ անհաջող քայլերի հանգուցալուծումը կլինի կրոնական նոր կազմակերպության ձեւավորումը։
Այս մտահոգությունները սկիզբ են առել այն բանից հետո, երբ տարեսկզբին՝ Սուրբ ծննդի նախօրեին, Նիկոլ Փաշինյանն ու կաթողիկոսի հեռացումը պահանջող 10 եպիսկոպոսները հայտարարեցին Հայ առաքելական եկեղեցու «բարենորոգման» մեկնարկի մասին եւ հրապարակեցին իրենց «ճանապարհային քարտեզը»։
Փաստաթղթի համաձայն՝ ստեղծվելու է համակարգող խորհուրդ, որի առջեւ կլինի Հայ առաքելական եկեղեցու «բարեփոխման» կազմակերպչական հարցերը։ Կարևոր դրույթներից է նոր կանոնադրության ընդունումը, որի միջոցով պետք է ամրագրվեն սկզբունքների պահպանման, ֆինանսական թափանցիկության եւ հոգեւորականների բարեվարքության ապահովման կառուցակարգերը։
Հրապարակում նշվում է, որ վարչապետի մերձավոր շրջապատում կարծում են, որ կանոնադրությունը գրում է անձամբ Նիկոլ Փաշինյանը, եւ այն պատրաստ կլինի փետրվարի կեսերին՝ գրանցման համար։ Այս կերպ, նոր կազմակերպությունը կգրանցվի որպես կրոնական հերթական կազմակերպություն, եւ, ինչպես ժողովրդական լեզվով ասած, Նիկոլ Փաշինյանը կդառնա նոր աղանդի հիմնադիրը։
Հայաստանում ներկայում գործում է վեց տասնյակից ավելի կրոնական կազմակերպություն։
Իշխանական աղբյուրները նաեւ հակադրում են այս իրադարձությունները Սերժ Սարգսյանի դեպքին՝ նշելով, որ իրականությունից բավականին հեռու է Նիկոլ Փաշինյանի այն պնդումը, թե ինչպես Սերժ Սարգսյանը չուզելով հեռացավ, այնպես էլ Վեհափառը կհեռանա։ Նրանք վստահ են, որ Գարեգին Բ-ն ինքնակամ չի հեռանալու, եւ հեռացնելու այլ մեխանիզմ գոյություն չունի։